Minlərlə şagirdə onlayn dərs tətbiq etmək olmaz - S. Rüstəmxanlı

17.09.2020 16:25     Sosreaksiya     738

İnternetdən məhrum olan minlərlə şagirdə onlayn dərs tətbiq etmək olmaz. Hesab edirəm ki, Təhsil Nazirliyi bu məsələyə yenidən baxmalıdır.

Reaksiya.az xəbər verir ki, bu sözləri Vətəndaş Həmrəyliyi Partiyasının (VHP) sədri, millət vəkili, xalq şairi Sabir Rüstəmxanlı deyib.

O bildirib ki, onlayn dərslərin keyfiyyətinə o qədər də ümid bəsləmir:

“Bir çox kənddə internet, hər evdə kompüter yoxdur. Ölkədəki 1.6 milyon şagirdin 1 milyonu virtual məktəbdən qeydiyyatdan keçib, 600 min şagird kənarda qalıb. Bu dərs növü həm baha, həm də günümüz üçün real deyil. Hələ onlayn sistemə keçid həddinə gəlib çatmamışıq. Mövcud şərtlərdə şagirdlərin yalnız 30-35 faizi onlayn dərslərə cəlb oluna bilib və çox az hissəsi elektron resurslardan istifadə edir. Regionlarda isə elektron resurslardan istifadə faizi daha azdır. Dağ rayonlarında və ümumiyyətlə bölgələrdə internetləşmənin yaxşı səviyyədə olmadığı hər kəsə bəllidir”.

Millət vəkili distant təhsilin təklif edilməsini qeyri-peşəkarlıq adlandırıb:

“Düzdür, distant təhsil çox məşhurlaşıb, faydalıdır, müasir təhsil sisteminə keçiddə böyük rol oynayır. Amma bu, ənənəvi təhsilin yerini vermir. Şagirdlərin məktəb və müəllimlərlə ünsiyyətdə olmamasının onların formalaşmasında mənfi iz buraxacağı şübhəsizdir. Digər bir tərəfdən şagird sayının az olduğu, karantin elan olunmayan bölgələrdə internet və televiziya imkanlarının məhdudluğu etiraf olunmalıdır. Bütün bunlar təhsil və məktəblərin açılması ilə bağlı qərara yenidən baxılmasını zəruri edir. Bütün bunları nəzərə alaraq Təhsil Nazirliyi və Operativ Qərargah ənənəvi əyani təhsil sistemini bərpa etmək üçün lazımi tədbirləri görməlidir”.

Reaksiya.az

Şərhlər